Varia 65 E6-prosjektet Østfold, Band 1, Hus og gard langs E6 i Råde kommune

Abstract

E6-prosjektet Østfold har vore eit omfattande forvaltingsprosjekt ved Kulturhistorisk museum, Universitetet i Oslo, og det har utført ei av dei største flateavdekkjingsundersøkingane ved museet til no. Granskingane vart utført i tida frå 2003–2006 og dei påviste eit stort og variert busetjingsmateriale frå eldre bronsealder til vikingtid. Talet på kjente førhistoriske hus og gardar i Østfold men også resten av Austlandet har med dette fått ein monaleg auke. Materialet har stor kjeldeverdi for vidare forsking om den førhistoriske gardsbusetjinga i regionen. Prosjektet har utvikla ein metode for permanent tildekking av helleristingar, delar av eit gravfelt frå eldre og yngre jarnalder vart granska, saman med ei gravrøys frå bronsealder. Naturvitskaplege analysar har hatt ein sentral plass i prosjektet og det vart innleidd eit samarbeid med Arkeologisk museum i Stavanger om utføring av analyser av plantemakrofossil og mikrofossil. Avtalen vart etterkvart utvida til å omfatte jordmikromorfologiske analyser. Analysane har gitt eit nytt og omfattande kjeldemateriale som vil kaste lys over den førhistoriske garden og driftsformer i det tidlege jordbruket. Dette er det første av fem Varia-band frå E6-prosjektet Østfold. I dette bandet vert det gjort greie for bakgrunnen for prosjektet og problemstillingar vi har arbeidd med. Arkeologiske og naturvitskaplege resultat frå dei fem lokalitetane som vart granska i Råde kommune vert presentert; Grimstad østre, Strømshaug, Lundeby, Borge vestre og Missingen. I band 2 og 3 vert resultata frå granskingane i Sarpsborg og Fredrikstad kommunar presentert. Band 4 skildrar sikringstiltak og dokumentasjon av helleristingar i regi av prosjektet, medan band 5 tek for seg metodiske erfaringar vi har gjort oss og det rommar ei naturhistorisk og kulturhistorisk syntese.